Yfirlýsing frá stjórn VSFK

Verkalýðs- og sjómannafélag Keflavíkur og nágrennis
Um 260 félagsmenn VSFK sem starfa hjá Reykjanesbæ eru með lausan kjarasamning síðan 31. mars á
þessu ári. Þessir starfsmenn eru langflestir meðal þeirra lægst launuðu hjá sveitarfélaginu.
Enn fá þessir félagsmenn okkar kalda vatnsgusu í andlitið frá sveitarfélaginu.
 
Fyrst var þeim neitað um eingreiðsluna sem kom í ágúst. Sú aðgerð var sett upp til að refsa
Starfsgreinasambandsfélögum vegna þess að þau höfðu vísað deilunni til Ríkissáttarsemjara. Nú hefur
Reykjanesbær hækkað laun sviðstjóra sem þegar voru með rúmlega þreföld laun þeirra á lægstu
töxtunum hjá sveitarfélaginu og er það réttlætt með þeim rökum að þeir hafa dregist aftur úr launum
sviðsstjóra í öðrum sveitarfélögum.
 
Veltum við fyrir okkur hvort Reykjanesbær hafi tekið Lífskjarasamninginn úr sambandi og hvort við
megum eiga von á sambærilegri hækkun fyrir okkar félagsmenn?
Það er líka gott, í þessu samhengi, að minna á að eftir hrun var skorið niður, hjá almennum
starfsmönnum, svo gott sem alla aukavinnu sem gerði fólki kleift að hífa upp launin sín. Þessi
niðurskurður hefur ekki gengið til baka og stór hluti starfsmanna er einungis með sín grunnlaun til að
lifa af.
 
Væri ekki nær að klára þessa samninga fyrir jólahátíðna og rétta stöðu þeirra lægst launuðu fyrst,
áður en hafist er handa við hækkun hjá þeim sem þegar hafa há laun? Væri ekki nær að pressa á
samninganefnd sveitarfélaga að klára þessa samninga og sýna með því almennu starfsfólki
sveitarfélaga þá virðingu sem það á skilið?
 
Fyrir hönd stjórnar VSFK
Guðbjörg Kristmundsdóttir
Formaður.

Kjaramál

Kjaramál eru eitt mikilvægasta viðfangsefni hvers stéttarfélags. Verkalýðs- og sjómannafélag Keflavíkur og nágrennis er aðili að allmörgum kjarasamningum.

Orlofsmál

Orlofsárið er tímabilið frá 1. maí til 30. apríl ár hvert. Samkvæmt lögunum, skal veita orlof í einu lagi á tímabilinu frá 2. maí til 15. september, nema um annað sé samið.

Umsóknir og eyðublöð

Hér er hægt að nálgast eyðublöð til að sækja um bætur úr sjúkrasjóði, fræðslusjóðum, orlofsaðstöðu og önnur eyðublöð sem tengjast starfsemi félagsins.